Tilraun sem vonandi gengur vel

Það hlaut að koma að því að strandsiglingar yrðu reyndar á ný. Vonandi er að þessar siglingar til Ísafjarðar gangi upp og Norðurlandi og Austfjörðum verði bætt við. Það er í raun allt sem mælir með strandflutningum, ekki síst núna þegar eldsneytisverð er í hæstu hæðum. Allt of miklir þungaflutningar eru á þröngum og illa undirbyggðum þjóðvegunum og svo ekki sé talað um útblásturinn frá öllum þessum bílum. Það þarf nokkuð marga trukka til að flytja einn skipsfam svo ólíku er saman að jafna hvað mengun varðar.

Skip Eimskips sigla til Vestfjarða

Er ráðherrann ekki í ríkisstjórn?

Er ekki sjávarútvegs- og landbúnaðarráðherrann í ríkisstjórn? Það hlýtur að vera einfaldasti hlutur fyrir hann að beita áhrifum sínum til lækkunar vaxta, fyrst fjármagnskostnaður ætlar allt lifandi að drepa. Ef þessi umhyggja fyrir fjármagnseigendum væri ekki svona ríkjandi í hans flokki þá væru vextir ekkert hærri hér á landi en annarsstaðar. Hvað þá lánskjaravísitalan. Hann mætti beita sér fyrir því að leggja hana niður.

Landbúnaður í kröggum

Bévítans klukkið

Hann Runólfur Jónatan Hauksson sendi á mig eitthvað sem heitir klukk um daginn. Þetta er vist nokkurs konar keðjubréf sem maður má ekki slíta. Ég hef alltaf verið mótfallinn keðjubréfum en læt undan núna. Var í mestu vandræðum með að svara en þetta varð niðurstaðan.

 

Fjögur störf sem ég hef unnið um ævina:

Sjómennska og verkamannastörf

Prentari

Vinnuvélastjóri

Blaða- fréttamaður

 

Fengist við ýmislegt fleira

 

Fjórar bíómyndir sem ég held upp á:

 

Á yngri árum var ég hreinlega alltaf í bíó enda Roy Rogers sýndur sjö sinnum í viku hjá Jóni í Bíóhöllinni á Akranesi. Trygger kom alltaf til Roy þegar hann blístraði en þegar Roy var farinn að blístra á Wylisinn sem tók við af Trygger hætti ég að fara í bíó í mörg ár en þessum myndum manég eftir

 

Roy Rogers, (sennilega yfir 50 myndir)

Silent Movie ( frábær þögul mynd, þar sem einu sinni kom fyrir orð: No)

Nýtt líf (og raunar allar myndir Þráins Bertelssonar)

Brúðguminn (og líka mynd Balta sem tekinn var upp á Norðfirði, man ekki nafnið)

 

Fjórir staðir sem ég hef búið á:

 

Akranes, Neskaupstaður, Egilsstaðir, Akureyri ( svo líka smá í Reykjavíkurhreppi)

 

Fjórir sjónvarpsþættir sem mér líkar:

 

Horfi ákaflega lítið á sjónvarp utan frétta. Leiðist amrískar yfirborðskenndar sápur, sem tröllríða íslensku sjónvarpi. Horfði þó á einhvern danskan sakamálaþátt sem ég man ekki hvað heitir og líka þenna danska um örninn, set hann efstann.. Svo hef ég gaman af Bubbi byggir þegar ég hef horft á hann með Marinó Bjarna, afastráknum.

 

 

Örninn

Kastljóst

Út og suður

Bubbi byggir

 

Fjórir staðir sem ég hef heimsótt í fríum:

Köln og allt þar í nágrenninu

Bandaríkin, austurströndin

Noregur frá Osló norður til Bergen

Færeyjar (nokkrum sinnum)

(Þetta eru þeir minnisstæðustu, svo er náttúrlega hver einasta krummaskuð á Íslandi, og nánast Ísland frá fjöru til fjalla, smá viðkoma í Englandi, Danmörku en aldrei til sólarlanda komið og langar ekki par þangað)

 

 

Fjórar síður sem ég skoða daglega fyrir utan blogg:

 

barnanet.is/magnason

skessuhorn.is

ruv.is/austurland

austurglugginn.is

(auðvitað svo mbl.is - visir.is - dv.is og margt fleira)

 

 

 

Fernt sem ég held uppá matarkyns:

 

Skata

Saltfiskur (bæði soðinn og steiktur)

Lax

Silungur (bæði bleikja og urriði, hvort sem er steiktur eða soðinn)

(margt annað t.d íslenskt lambakjet, reykt svín, humar, skelfiskur og bara að nefna það..)

 

Fjórar bækur sem ég hef lesið oft:

 

Ég lifi (Martin Grey)

Íslandsklukkan (Laxnes)

Fljótsdælasaga (höfundur ókunnur)

Íslensk orðabók Menningarsjóðs

 

Fjórir bloggarar sem ég klukka.

 

Hverja á ég svo að klukka. Ég vel nokkra bloggvini og vorkenni þeim heilmikið:

 

gullilitli http://gullilitli.blog.is/blog/gullilitli/

pelli http://pelli.blog.is/blog/pelli/

holmdis http://holmdish.blog.is/blog/holmdish/

hafsteinn viðar http://hva.blog.is/blog/hva/

 

 

 

 

Gylfi veit hvað hann syngur

Gylfi veit nákvæmlega hvað syngur í þessum málum. Þetta sem haft er eftir honum í fréttinni er nákvæmlega málið: Hann segir þó ljóst að hvorki SA né ASÍ hugnist aðgerðaleysi stjórnvalda í efnahagsmálum. ,,Það liggur ljóst fyrir og hefur margoft komið fram í málflutningi bæði ASÍ og SA að þörf er á því að þessi stóru samtök með einhverjum hætti snúi bökum saman í því að finna leiðir út úr þeim ógöngum sem okkar efnahagsmál eru komin í,"   Ég held að landmenn allir séu í raun sammála Gylfa í þessum efnum. Geir og Solla eru bara einhversstaðar í burtu að bjarga heiminum. Kannski að spila á fiðlu. - Hvað gerði Neró meðan Róm brann?

Ennþá langt í þjóðarsátt

Í Kjaradóm með þetta, hann hefur reynst ríkisstarfsmönnum vel

Enn er allt í hnút. Segi bara enn og aftur fyrst ríkisstjórnin hefur ekki manndóm í sér að leysa þetta mál þá er einfaldast að hún leggi það fyrir kjaradóm. Kjaradómur hefur reynst örlátur og skilningsríkur við þá ríkisstarfsmenn sem hann úrskurðar um launakjör fyrir, eins og æðstu embættismenn þjóðarinnar.

Verkfall hefst á miðnætti

Mál til komið að hafa vit fyrir ríkisstjórninni

Það er gott til þess að vita að Samtök atvinnulífsins og Verkalýðsforystan skuli vera komin á fullt í þessi mál. Ég tala nú ekki um ef bankarnir verða með og hægt verður að tjónka eitthvað við forsvarsmenn þeirra. Það sjá allir að í óefni stefnir nema þessi handónýta ríkisstjórn og helst að þessi samtök geti komið vitinu fyrir ráðlausa formenn stjórnarflokkanna. Það er að segja ef það tekst að stoppa á þá á landinu í smá tíma til viðræðna. Mál til komið að einhver hafi vit fyrir þeim.

Reynt að ná víðtækri sátt á vinnumarkaði

Burt með þessa ríkisstjórn

Hver þingmaðurinn af öðrum kemur upp í stól Alþingis og lýsir yfir stuðningi við það réttlæti sem ljósmæður fara fram á. Nú síðast félagsmálaráðherra, sem er eini ráðherrann sem eitthvað hefur látið að sér kveða í þessari ríkisstjórn. Bera þingmenn og ráðherrar virkilega enga virðingu fyrir Alþingi og þjóðinni? Koma upp í ræðustól Alþingis og segja eitt en láta svo einhverja undirsáta um að segja annað. - Ríkisstjórnin á að segja af sér. - Þetta mál er miklu stærra en aðgerðarleysið í efnahagsmálum. - Ég vorkenni Sjálfstæðisflokknum, honum hefur aldrei verið sjálfrátt þegar almannaheill er annars vegar en Samfylkinginn á nú þegar að ganga úr ríkisstjórn og láta efna til kosninga. Ef sá flokkur er svo kúgaður að hann getur ekki sinnt sínum stefnumálum er betra heima setið. Samfylkingin byggir á grunni félagshyggju og svona framkoma er fyrir neðan allar hellur.

Samningar tókust ekki

Hreindýrin hafa haft það gott

Þetta er ótrúleg veiði, hátt í tólf hundruð dýr. Mér finnst ekki langt síðan kvótinn var um 500 dýr. Þetta sýnir bara hvað hreindýrin hafa haft það gott undanfarin áratug því veiðikvótinn er alltaf ákveðið hlutfall af stofnstærð en talið er úr lofti á hverju ári. Manni finnst líka hreindýr verða meira áberandi á láglendi með hverju árinu sem líður. Hér áður fyrr sáust þau ekki á láglendi nema í hörðum árum og svo tarfar síðla vetrar þegar kýrnar reka þá frá sér eftir að þeir hafa gagnast þeim. Eflaust næst nánast allur kvótinn eins og Jóhann Gunnar segir.

Búið að fella 1185 hreindýr

Lánskjaravísitalan er vandamálið ekki verðtryggingin

Verðtrygging er kannski ekki vandamál og rétt hjá Björgvin að án hennar myndi sparnaður fljótt étast upp í verðbólgu meðan krónan er í gildi hér. Það er hins vegar spurning hvort Lánskjaravísitalan er rétti mælikvarðinn. Hvort grunnurinn fyrir henni er sanngjarn. Er ekki tímabært að skoða hvernig hún er byggð upp, t.d. allir neysluþættir hennar, húsnæðisliðurinn og fleira? Þar má örugglega gæta meira réttlætis. Óréttlætið í uppbyggingu hennar er svo mikið og allt skuldurum í óhag. Full ástæða er fyrir Björgvin viðskiptaráðherra að skoða grunninn að verðtryggingu betur. Hann byggir á að vernda stóreignamenn sem fitna því í verðbólgu eins og púkinn á fjósbitanum.

Val um verðtryggingu

Viðurkennið að þetta snýst um sjálfsögð réttindi

Skyldu undirsátar dýralæknisins koma með jákvæðu hugarfari á fundinn? Ríkisvaldið þarf að viðurkenna að þarna er verið að semja um réttlætismál og jafnrétti. Eina krafa ljósmæðra er að menntun þeirra sem metinn til jafns á við menntun annarra, sem starfa við kjarabaráttu. Það eru bara sjálfsögð réttindi. Meðan samninganefnd ríkisins hefur aðeins umboð til að líta á þetta eins og hverja aðra kjarasamninga frá því í vor þá er ekki von á góðu.  

Samningafundur með ljósmæðrum