Að eiga góða granna

Fljótsdalshreppur hreykir ser hátt núna og ætlar að lækka útsvar. Eflaust er eitthvað eftir í sjóðum ennþá frá virkjunarframkvæmdum við Kárahnjúka, þrátt fyrir tap í bankahruninu. Svona sveitarfélög geta hins vegar ekki leyft sér lægra útsvar nema að eiga góða nágranna, samanber Skilmannahrepp og Seltjarnarnes hér áður fyrr. Fljótsdalshreppur er eyja inni í sveitarfélaginu Fljótsdalshéraði og nýtur góðs af öllu því sem þar hefur verið byggt upp. Nú er spurning hvort Fljótsdalshérað á ekki að endurskoða samning við Fljótsdalshrepp um skólahald á Hallormsstað. Svona stöndugur hreppur hlýtur að geta rekið bæði leikskóla og grunnskóla án aðstoðar nágrannanna. Svo þarf líka skoða samninga um heilsugæslu, slökkvilið og fleira. Það er engin ástæða fyrir íbúa á Egilsstöðum og nágrenni að hlaða undir sveitarfélag sem hefur efni á því að innheimta lægra útsvar en önnur sveitarfélög.

Eitt sveitarfélag lækkar útsvar

Athugasemdir

[Víðir Benediktsson, 31.12.2008 kl. 12:17]

Þetta er svona skólabókardæmi um sveitarfélag sem nærist á uppbyggingu annarra. Þetta þekkjum við vel hér í bæ. Fljótsdalshreppur rekur enga félagsþjónustu og ef einhver þar þarf á henni að halda verður viðkomandi nær undantekningalaust að flytja úr sveitafélaginu. Þau sveitarfélög sem mest finna fyrir þessu eru Reykjavík og Akureyri. Það eru til þó nokkur dæmi um það að sum sveitarfélög hafa hreinlega vísað fötluðum einstaklingum til þessara staða undir þeim formerkjum að þar fái þeir miklu betri þjónustu.

[Hulda Margrét Traustadóttir, 31.12.2008 kl. 12:58]

Gleðilegt ár og takk fyrir kveðjuna. Alltaf gaman að heyra frá Austfirðingum. Það var gott að búa á Austurlandi. Ég hef líka trú á Norðurporti - vonum það besta. Áramótakveðja.  

[Magnús Sigurðsson, 31.12.2008 kl. 13:00]

Fljótsdælingar geta ennþá losnað við loftárásir með því að lána gjaldþrota Fljótsdalshéraði þessar 550 milljónir sem þeir eiga eftir virkjunar ævintýrið og hrun bankanna.

[Þorsteinn Valur Baldvinsson, 31.12.2008 kl. 14:16]

Er ekki nær að gleðjast yfir góðum hag nágrana en hugleiða fjárkúgun, Bæjarstjórn Fljótsdalshéraðs tók sjálfviljug sín lán og ef ráðstöfun þess fjár er ekki að skila arði til sveitarfélagsins, erum við kjósendur og útsvarsgreiðendur  ábyrgir fyrir þeim greiðslum.

Bæjarstjórn starfar í umboði meirihluta kjósenda sem verða svo að greiða fyrir sitt val á kjörnum fulltrúum úr launaumslögum sínum.

Megi hagur allra okkar nágrana vera sem bestur, og arður sem mestur um ókomin ár.

Ég mun ekki styðja það að ráðast sem ránfugl á þann sem vel aflar.

Gleðileg ár

[Haraldur Bjarnason, 31.12.2008 kl. 15:09]

Skil þig ekki Valli, því miður, en gleðilegt ár.