Til hamingju AFL

Ástæða er til að fagna þeim áfanga sem AFL, starfsgreinafélag á Austurlandi, hefur náð í baráttu sinni fyrir sjálfsögðum mannréttindum erlendra starfsmanna, sem ráðnir voru til vinnu hér á landi af starfsmannaleigum. Sverrir Mar Albertsson, framkvæmdastjóri Afls, og hans fólk hefur ekkert gefið eftir í baráttunni þrátt fyrir mótmlæti og á tíðum svívirðingar vegna þessara mála. Nú hafa GT verktakar viðurkennt upp á sig skömmina, en þó ekki nema að hluta. Þetta ætti að verða öðrum víti til varnaðar, því öruggt er að hér er ekki einsdæmi á ferðinni og pottur brotinn víða um land. Verkalýðshreyfingin hefur staðið sig vel og nú vinna menn þar að samræmingu aðgerða og nýta sér án efa reynslu Austfirðinga í þessum efnum. 

Greiddu 4,2 milljónir kr. í vangreidd laun

Sparnaðurinn er sá að fækka á landsbyggðinni

Það er merkilegt að fyrstu viðbrögð forsvarsmanna ríkisstofnanna við sparnaði skuli vera að leggja niður starfsemi utan höfuðborgarsvæðisins. Þetta er að gerast núna hjá Fasteignamati ríkisins og annað hvort eru embættismenn þar að vinna gegn yfirmönnum sínum, sem eru stjórnvöld, eða þá að allt tal stjórnvalda um aukin störf á landsbyggðinni, er innantómt hjal. Skrifstofum Fasateignamatsins í Borgarnesi og á Egilsstöðum verður lokað en skrifstofan á Selfossi heldur þó velli þrátt fyrir að vera í túnjaðri höfuðborgarsvæðisins, heldur nær en Borgarnes. Nú veit ég ekki hvort starfsmenn fasteignamatsins geta unnið öll sín störf á skrifstofu en þó ef ég á tilfinningunni að þeir þurfi öðru hvoru að bregða sér af bæ út á þann vettvang sem þeir starfa við. Störfunum sem eru í Borgarnesi á að sinna frá höfuborginni og kannski ekki of langar leiðir að fara í því tilfelli. Öðru vísi horfir þetta við fyrir austan. Akureyrarskrifstofu Fasteignamatsins er ætlað að sinna verkefnum á Austurlandi. Frá Akureyri eru tæpir 300 kílómetrar til Egilsstaða og auðvitað en lengra á firðina, þeirri starfsemi verður ekki sinnt með góðu mót nema með einhverskonar fjarstýringu. Það geta ekki verið miklir peningar sem sparast við þetta. Einn starfsmaður á Egilsstöðum og tveir í Borgarnesi, eflaust einhver kostnaður við skrifstofuhald en maður bara veltir því fyrir sér hvort ekki hefði verið hægt að ná þessum sparnaði á höfuðborgarsvæðinu. - Hvað segja stjórnarþingmenn og ráðherrar nú?  - Er það stefna þeirra að snúa við þeirri þróun sem þeir þykjast hafa verið að berjast fyrir?

Fasteignamat lokar skrifstofum

Ambögur og óskiljanlegur texti

Mér finnst með ólíkindum hve mikið af illa skifuðum fréttum er að finna á mbl.is. Ég held þó að frétt sem sett var inn á vefinn kl 15:58 í dag slái öll met. Fyrirsögnin er höfð eftir forsætisráðherra og er um að það hafi slæm áhrif þegar stíga þurfi snöggt á bremsurnar. Textinn í þessari frétt er með ólikindum. Fullur af ambögum og málfræðivillum. Textinn er svo vitlaus á allan hátt að þýðingu þarf með á íslensku, enda óskaði ég eftir því með tölvupósti til mbl.is. - Þetta er annað slæma dæmið, sem ég sé á mbl.is í dag. Hitt var í frétt um efnahagsmálin í morgun og var sá texti lagaður, þannig að hann varð skiljanlegur. - Það er tími til kominn að þeir sem skrifa fréttir á mbl.is taki sig nú á í framsetningu texta. - Þetta er ekki nokkrum manni bjóðandi.

Forsætisráðherra: Hefur slæm áhrif þegar stíga þarf snöggt á bremsurnar

Búið að laga

Já þetta er heldur skárra núna og menn hafa greinilega drifið í að laga textann sem fyrst fór út. - Þessi hroðvirkni í textagerð á mbl.is er alltof algeng.

 

Óskiljanlegt

Væri ekki rétt að láta túlkun eða einhverskonar orðaskýringar fylgja með byrjun þessarar fréttar. - Getur verið að einhver skilji þetta? - Tel mig vera með þokkalega íslenskukunnáttu og sæmilegan skilning á íslensku máli, en ég get alls ekki skilið þessa byrjun á fréttinni, sem á að vera tilvitnun í Financial Times. 

Orðstír Íslands í ólgusjó

Ítrekað rafmagnsklúður eystra

Það er eitthvað bogið við þessi rafmagnsmál eystra, fyrst það getur ítrekað gerst að rafmagnslaust verður þar vegna einhvers brölts í Alcoa álverinu. Auðvitað er það frekar skítt að Héraðsbúar, sem sjá til þess að álverið á Reyðarfirði geti gengið, með því að senda því rafmagn, skuli þurfa að sitja í myrkri og kulda af völdum álversins. Þetta er enn bagalegra, þar sem mörg hús eystra eru hituð með rafmagni og svo vita allir að svona rafmagnsleysi hefur áhrif á rafmagnstæki og ekki á jákvæðan hátt. Þessir sömu rafmagnsnotendur þurfa svo að borga margfalt meira fyrir rafmagnið sitt en sá sem veldur þeim tjóninu. - Er eitthvað réttlæti í þessu?

Álverið sló út rafmagni

Af hverju er Birkir Jón hræddur?

Þetta er athyglisvert verkefni sem Ásdís Jóna Sigurjónsdóttir er að fá styrk til að vinna, um hvort tengsl séu mili kynferðis og árangurs í prófkjörum stjórnmálamanna. Ástæða til að óska henni til hamingju. - Birkir Jón alþingismaður, framsóknarmaður og pókerspilari með meiru, bloggar um styrkveitinguna, hælir henni og segir Ásdísi Jónu hæfileikakonu. Það vekur svo athygli að hann segist vera ansi hræddur um að hún eigi eftir að rata enn frekar inn á vettvang stjórnmálanna. - Hvers vegna hann er hræddur um að hún rati þangað er ekki gott að segja en kannski er það vegna þess að hún var í framboði fyrir Sjálfstæðisflokkinn í Norðausturkjördæmi fyrir síðustu kosningar. Birkir Jón þarf sennilega að leggja talsvert undir í spilinu við þennan sveitunga sinn, fari svo að Ásdís Jóna verði í framboði næst, þar dugar líklega ekki nein Framsóknarvist. 

Verkefni um árangur kvenna í prófkjörum fær styrk FS

Smá aukaskammtur

50.000 tonn núna til viðbótar við það lítilræði sem búið er að veiða, líklega verður það ekki meira og rannsóknarskipið er að fara á brott til annarra verka. Þetta verður þá ekki stór vertíð. Loðnan virðist sem sagt vera að koma upp á grunnið eftir nokkuð hefðbundinni gönguslóð. Loðna í Lónsdjúpi, Litladjúpi og á Papagrunni, ætli að það sé ekki bara meira austar og dýpra? - Svo er það spurning um vestangöngu, ekki ólíklegt, en það er hinsvegar ljóst að veiðistoppið á dögunum var óþarfa klúður. Hver dagur á loðnuveiðum skiptir miklu, því hún fer hratt yfir og fremsti hluti göngunnar nálgast hrigningu. Vonandi verður reynslan af þessari vertíð sett í reynslubankann, þótt maður sé efins um að nokkur slíkur banki sé til varðandi fiskveiðar- og nýtingu. 

Leggja til aukningu loðnukvóta

Nýtum Ítalaborinn

Síðasti ofurborinn, sem Impregilo hefur notað við jarðgangagerð vegna Kárahnjúkavirkjunar, fer senn að ljúka hlutverki sínu. Hinir 2 borarnir eru þegar farnir úr landi. Nokkuð langt er síðan Austfirðingar fóru að hreyfa þeirri hugmynd að nýta þennan síðasta bor til að bora í gegnum Austfjarðafjallgarðinn og tengja saman firði og Hérað enda nærtækast að nýta hann á Austurlandi, þar sem hann er nú. Umræðan hefur nú blossað upp að nýju og verið nokkuð áberandi hér á blogginu eftir að Stöð 2 og vísir.is fóru að segja frá málinu. Ekkert hefur hinsvegar sést um þetta í Mogganum, enda þekkt þar á bæ að bíða aðeins með umræðu ef hún hefst ekki í Mogganum en síðan koma Moggamenn fram á sviðið með nýjan vinkil og láta sem ekkert hafi heyrst af málinu áður. Borinn, sem eftir er hér á landi á víst nokkuð langt eftir af líftíma sínum en fróðir menn segja að um 1 milljarð kosti að koma honum í gott ástand með nýrri krónu og öllu sem til þarf. Nú hefur Vegagerðin komið til liðs við heimamenn fyrir austan um að skoða þetta mál. Hugmyndin um að tengja saman firði og Hérað með jarðgöngum frá Eskifirði, um Norðfjörð, Mjóafjörð og Seyðisfjörð er yfir 30 ára gömul en henni var svo lyft upp aftur með stofnun samtaka sem kalla sig "Samgöng". Það er auðvelt að sjá á landakorti hve þetta liggur beint og þessi tenging yrði algjör bylting á samfélaginu. Miklar rannsóknir hafa nú þegar verið gerðar á sumum þessara staða og eflaust nýtast þær til að byggja ofan á. Þessi framkvæmd ætti ekki að þurfa að hafa áhrif á aðrar samgöngubætur í landinu og brýnt að skoða hvort þetta er raunhæfur möguleiki, eins og reyndar nokkrir fagmenn á þessu sviði hafa þegar bent á. Drífum í að skoða þetta áður en ítalirnir senda borinn úr landi. - Jarðgöng eru einföldustu og ódýrustu samgöngu- og samfélagsúrbætur hér á landi.

Páskaeggin standa þá undir nafni

Páskaeggin hans Helga í Góu ættu þá að standa undir nafni þetta árið. Svoldið langt í að það gerist næst (152 ár) en aldrei að vita nema það takist. Áttaði mig á að stutt er til páska þegar ég sá súkkulaðihauginn í verslunarferð í dag, stutt eða stutt ekki, það eru þó 20 dagar til stefnu ennþá.

Sjaldgæfir góupáskar