Góð hugmynd og hafa rafrænar kosningar líka

Það er kjörið að nota sveitarstjórnarkosningar til að reyna persónukjörið. Í raun var þetta reynt í sameiginlegu prófkjöri flokkanna fyrir sveitarstjórnarkosningar hér á Akranesi fyrir um 25-30 árum. Þá raðaði fólk frambjöðendum á sinn lista í prófkjörinu og tókst vel. Svo á auðvitað að taka upp rafræna kosningu þó ekki væri nema jafnhliða þessu hefðbundna pappírsfargani. Þetta er ótrúlega gamaldags kerfi eins og hefur verið. Það er mannfrekt og seinvirkt. Stjórnmálaflokkarnir voru með rafræn prófkjör fyrir síðustu kosningar og líka í kjöri forystumanna. Allt annað er tímaskekkja.

Persónukjör á næsta ári?

Athugasemdir

[Björn Leví Gunnarsson, 12.5.2009 kl. 18:01]

Rafræn kosning þýðir að þú kýst á tölvu í kjörklefanum, ekki heiman frá þér.

... allavega sem fyrsta skref.

Bara að fyrirbyggja misskilning því að rafræn kosning líkt og var fyrir listaprófkjör flokkanna virkar ekki fyrir almennar kosningar öryggisins vegna (eins og er)

[Sigurður M Grétarsson, 12.5.2009 kl. 18:03]

Rafrænar kosningar skiluðu ágætis árangri í prófkjörum Samfylkingarinnar fyrir síðustu kosninar. Svo ganga rafrænar kosningar ágætlega í Eistlandi.

Persónukjör hefur sína kosti og sína galla. Það er því áríðandi að hver flokkur hafi val um það hvort hans kjósendur fái að kjósa samkvæmt persónukjöri eða ekki.

[Haraldur Bjarnason, 12.5.2009 kl. 18:05]

Ég held að ljóst sé eins og Björn Leví bendir á. Í það minnsta í fyrstu og líklega vera bæði kerfin að vera í gangi til að byrja með.

[Sigurður M Grétarsson, 12.5.2009 kl. 18:06]

Í Eistlandi geta menn kosið á netinu heima hjá sér og gengur vel. Þeir nota þá aðferð að þegar menn kjósa þá fer atkvæðið í "umslag" sem ekki er hægt að skoða í en þegar kjörfundi er lokið þá "fer það í kassann". Hvenær, sem er geta menn kosið aftur og þá ógildist fyrra atkvæðið. Menn geta einnig mætt á kjörstað og þá ógildist rafræna atkvæðið. Það er því ekki hægt að þvinga neinn til að "kjósa rétt" nema fylgjast með honum þangað til kjörfundi lýkur.

[Haraldur Hansson, 12.5.2009 kl. 18:17]

Það myndi einfalda rafrænar kosningar ef landið væri eitt kjördæmi. Það er hægt í þjóðaratkvæðagreiðslu en yrði flóknara í þingkosningum. Þá eru rafrænu skilríki væntanleg, loksins, sem gera þetta líklegra.

Sigurður nefnir Eistland. Ef ég man rétt fara allar auðkenningar þar í gegnum bankana. Öll rafræn skilríki eru vegna netbanka og ríkið nýtir sér þau.

[Haraldur Bjarnason, 12.5.2009 kl. 23:29]

Það er gott að prófa þetta í sveitarstjórnarkosningum. Þar hafa öll atkvæði janfmikið vægi eins og ef landið væri eitt kjördæmi. Hitt ætti heldur ekki að vera  óleysanlegt með núverandi kjördæmaskipan enda sjáum við stöðu mála í sjonvarpi frá tölvu nú þegar jafnóðum og tölur berast. Einkabankarnir eru kjörnir ef fólk á að geta kosið heima, þá fær það lykilnúmer í einkabanka sinn eins og RSK gerir nú þegar. Betra er að byrja á því að hafa sérstakar tölvur á kjörstöðum.

[Haraldur Hansson, 13.5.2009 kl. 09:10]

Sæll aftur nafni

Bara smá fróðleikur/viðbót:
Auðvitað er ekkert óleysanlegt, en munurinn á einu kjördæmi og 6 er verulegur í tæknilegri framkvæmd. Ég kom á sínum tíma að uppfærslu fyrirtækjaskrár og í framhaldinu stóð til að laga til í þjóðskrá líka. Því miður varð ekkert af því. Þetta var líklega 2002. Ég kem einnig að þessu sem þú nefnir með veflykla skattyfirvalda senda í einkabanka.

Til að gefa smá mynd af dæminu, þá hefði ekki verið hægt að gera mikið í þjóðskránni 2003 þar sem allar fjárveitingar til hugbúnaðargerðar voru þá þegar eyrnamerktar kjörskrá. Breytingar á kjörskrá voru þá umtalsverðar, m.a. skipting Reykjavíkur í tvö kjördæmi.

Í kosningasjónvarpinu er úrvinnsla á tölum byggð á einföldum forsendum, þ.e. höfðatala á kjörskrá og skipting atkvæða á lista. Kosningarnar sjálfar eru mun flóknara fyrirbæri.

Það sem skapar flækjur eru t.d. námsmenn og aðrir Íslendingar búsettir erlendis, sem hafa kosningarétt á Íslandi. Þeir þurfa að tilheyra kjördæmi sem væri ekkert mál ef landið væri eitt kjördæmi. Síðan þessar hefðbundnu breytingar; nýir á skrá v/aldurs eða flutnings til landsins, andlát, brottfluttir og flutningar milli kjördæma, svo dæmi séu nefnd. Það síðasttalda væri heldur ekki til vandræða í eins kjördæmis fyrirkomulagi.

En auðvitað er þetta framtíðin. Ég held að hressileg uppfærsla á íslensku þjóðskránni, þar sem hún væri færð í nútímalegri gagnagrunn, sé ein af forsendum rafrænna kosninga. Rafræn skilríki eru nauðsyn ef menn eiga að geta kosið heima. Síðan myndi einfalda framkvæmdina að hafa landið eitt kjördæmi, en hitt tvennt er þó mikilvægara til að gera þetta kleift.

[Haraldur Bjarnason, 13.5.2009 kl. 10:03]

Mitt sjónarmið er einfalt nafni, landið verður eitt kjördæmi fyrr en síðar og það verður vonandi til að slá á mörg deilumál. Glöggt dæmi er síðan í gær um hve mörgum fannst það bruðl að ríkisstjórnin fundaði á Akureyri. Stöð 2 gerði sér meira að segja lítið fyrir í fréttatíma og tvöfaldaði flugfargjaldið til Akureyrar. En þetta breytist og tæknilega örðuglega er alla hægt að leysa. Því fylgir auðvitað kostnaður en kerfið eins og það er líka þungt í vöfum og dýrt. Kannski sparast þar eitthvað á móti.