Það er í og á svona sitt á hvað

"Lögreglan á Borgarnesi mætti í nótt...." Þannig byrjar þessi frétt. Venjan er sú að segja í Borgarnesi. Annars er þetta með á og í einhversstaðar alltaf umhugsunarefni. Engin regla er til um þetta. Einungis málvenja heimamanna sem ræður. Við getum ekki sagt að öruggt sé að segja í þegar það er nes, fjörður eða vík. Þannig er það til dæmis í þessu tilfelli að við segjum í Borgarnesi en á Akranesi. Svo segjum við í Reykjavík en á Húsavík. Í Hafnarfirði en á Ísafirði. Fyrir austan er nokkuð öruggt að nota á um firðina. Þar búa menn á fjörðum, t.d. á Borgarfirði eystra, en á Vesturlandi búa menn í Borgarfirði. Svona mæti lengi telja. Í eina tíð hékk listi upp á vegg á fréttastofu útvarps með málvenjunum fyrir hvern stað til glöggvunar fyrir fréttamenn. Þannig listar mættu vera víðar.

Reyndi að komast undan lögreglu

Athugasemdir

[Helga Guðrún Eiríksdóttir, 21.9.2008 kl. 16:47]

Ég er fædd og uppalin á bæ í Skagafirði sem heitir Vallanes. Þar er alltaf talað um í Vallanesi en ekki á því. En til gamans læt ég hér flakka skemmtilega vísu sem ég fékk frá Kela kaupfélagsfulltrúa þegar ég vann á sláturhúsinu forðum daga. Við vorum búin að kveðast á um hríð okkur til dægrastyttingar og voru vísumiðarnir látnir ganga á milli með sendli.

Held ég varla að vildi mig

Þótt vísur snjallar lesi

Hefur kalla hring um sig

Helga í Vallanesi.

[(IP-tala skráð) 21.9.2008 kl. 16:54]

Þú hefur sem sagt unnið í Efra, ég var bara í Neðra  .

Rétt hjá Haraldi þetta með í og á en ég hef t.d heyrt fólk bæði tala um að skreppa í Egilsstaði og að skreppa á Egilsstaði, hef ekki hugmynd hvort er réttara.

[Hólmdís Hjartardóttir, 21.9.2008 kl. 17:00]

Þetta eru málvenjur sem fara ekki eftir miklum reglum.  Eitthvað sem útlendingar geta aldrei skilið eða lært.  Ef ég er stödd á Húsavík og ætla til Akureyra fer ég inn eftir.....

[Haraldur Bjarnason, 21.9.2008 kl. 17:01]

Sigurlaug. Ég bjó og vann bæði í neðra og efra. Þetta er rétt hjá þér með Egilsstaði maður heyrir hvort tveggja. Þó segir fólk alltaf að það búi á Egilsstöðum. En þegar farið er til Egilsstaða er oft talað um að fara í Egilsstaði, það er rétt. 

[Haraldur Bjarnason, 21.9.2008 kl. 17:14]

Já Hólmdís. Hafnfirðingar fara líka allta inn eftir þegar þeir fara til Reykjavíkur en Akureyringar fara austur þegar þeir fara til Húsavíkur enda tala þeir alltaf í áttum, hvort sem er innanbæjar eða ekki. Svei mér þá ef þeirr leggja ekki í bílastæði og fara upp í rúmið eftir áttum. Ég er enn að átta mig hér á Agureyris.

[Hólmdís Hjartardóttir, 21.9.2008 kl. 17:17]

Og allir fara suður til Reykjavíkur

[Haraldur Bjarnason, 21.9.2008 kl. 19:06]

...meira að segja Hornfirðingar og ég held líka Vestmannaeyingar

[Hafsteinn Viðar Ásgeirsson, 22.9.2008 kl. 07:22]

...Örugglega Vestmannaeyingar Haraldur, úr Þorlákshöfn förum við suður til Reykjavíkur..?

[Helga Guðrún Eiríksdóttir, 22.9.2008 kl. 08:01]

Hér stefnir í handalögmál milli okkar Önnu,  það eru ár og öld síðan bærinn hét Skinþúfa.. en einhvern veginn komust krakkadýrin í sveitinni að þessu þegar ég var hrísla og kölluðu mig Skinnhúfuna. Mér fannst það skelfilegt!

[Hulda Elma Guðmundsdóttir, 22.9.2008 kl. 08:56]

Það er nú varla hægt að tala um að þó svona skilgreining hafi hangið uppi í fréttstofunni hafi fréttamenn farið eftir því. Ég held t.d. að ég fari alltaf í kaupstað og til Reykjavíkur og í Hafnarfjörð og svo förum við auðvitað öll inn í dal! Áfram með smjörið!

[Haraldur Bjarnason, 22.9.2008 kl. 09:07]

Svo er ekki sama hvort þú er að tala um að fara til staðanna eða að einhver búi þar. Þeir eru margir staðirnir sem bera kaupstaðarnöfn sem sveitarfélög en þau nöfn eru ekki notuð í daglegu stali, samanber Seyðisfjarðarkaupstaður, Hafnarfjarðarkaupstaður, Akureyrarkaupstaður, Akraneskaupstaður. En rétt er það alla tíð hafa Íslendingar farið í kaupstað.