Allt samkvæmt bókinni

Spár manna um auknar veiðar á vorgotssíld virðast nú vera að rætast. Ég man eftir að ég talaði við Jakob Jakobsson fiskifræðing þegar vorgotssíldin var farin að veiðast með sumargotssíldinni fyrir austan fyrir einum 10 árum og taldi hann þá allar líkur á að stofninn væri að ná sér að fullu og þetta stefndi bara í eina átt, aukna veiði og það í íslenskri lögsögu.

Að vísu eru miðin svolítið langt frá landi ennþá og það sem verra er að vinnsluskipin eru öll að veiða þetta í troll, sem bæði er gagnrýnivert veiðarfæri og krefst mikillar orku. Hins vegar kemur fram að Sigurður VE sé kominn með fulfermi í nót og vonandi að fleiri snúi sér að nótaveiðum, sem gerist örugglega þegar miðin færast nær landi og þau skip geta flutt síldina vinnsluhæfa til lands.  

Norsk-íslenska síldin veiðist vel

Athugasemdir

[Jóhann Elíasson, 9.6.2008 kl. 08:37]

Það er alveg með ólíkindum að síldveiðar og loðnuveiða í FLOTTROLL skuli enn vera leyfðar.

[Tobbi Villa (IP-tala skráð) 9.6.2008 kl. 08:51]

Hvað er svona athugavert við flottrolls veiðar á Norsk Íslenskri síld ?

[Jóhann Elíasson, 9.6.2008 kl. 13:06]

Ef síldin væri eingöngu tekin uppi við yfirborðið, í hringnót, þá hefði hún "griðastað" á öllu öðru dýpi en þegar hún er veidd í flottroll er ekkert mál að ná henni á hvaða dýpi sem er svo lengi sem einhver kvikindi eru til staðar og svo má spyrja sig að því hvernig flottrollið fari með hráefnið og hver arðurinn af veiðunum er því eins og allir vita þá er kostnaðurinn við veiðarnar mörgu sinnum meiri þegar veitt er í flottroll en í hringnót.  Ég tók þátt í því, þegar þorskinum var "mokað" upp í flottroll fyrir vestan á árunum 1978-1980 og ekki var þarna um að ræða glæsilegt hráefni og ekki fyllist ég af stolti þegar ég hugsa til þessara tíma, sem betur fer þá lagðist þessi veiðiskapur af en þá er bara farið yfir í aðrar tegundir og ég er þess fullviss að eftir nokkur ár hugsa menn til þess með hryllingi þegar þeir voru að "moka" upp síld í flottroll.  Tobbi ég veit að þú átt hagsmuna að gæta í þessu, það átti ég líka þegar ég var á sjónum en það er ekki þar með sagt að ekki sé hægt að sjá nema eina hlið á hverju máli.

[Haraldur Bjarnason, 9.6.2008 kl. 23:21]

Það eru nú flestar þjóðir búnar að banna þetta flottroll. Að vísu hafa veiðarfærarannsóknir hér við land ekki sýnt fram á beina skaðsemi þess, svo ég viti. Æskilegast er þó að síldin sé veidd í nót. Um þann veiðiskap er ekki deilt á torfufiski eins og síldinni en það er ekki víst að alltaf sé hægt að ná henni þannig en líkurnar aukast eftir því sem hún færist nær landi. Þetta er allt góðra gjalda vert sem þú segir Jóhann og ég hygg nú að útgerðirnar hafi engan áhuga á flottrollsveiðunum miðað við fregnir af síhækkandi olíuverði. Nótaveiðarnar verða sífellt hagkvæmari í samkeppninni og ekki kæmi mér á óvart að flottrollið liði undir lok fyrr en síðar, þó ekki væri nema vegna orkukostnaðarins.