Þau eru öll orðin 23 ára og öll fyrrverandi eitthvað

Já Sjálfstæðismenn komnir með hreinan meirihluta í Bæjarstjórn Akraness. Karen Jónsóttir fulltrúi Frjálslyndra gengin í flokkinn og Gísli S. Einarsson bæjarstjóri, fyrrum krati og Samfylkingarmaður líka genginn í Sjálfstæðisflokkinn, enda kannski ekki óeðlilegt því sá flokkur stillti honum upp sem bæjarstjóraefni fyrir síðustu kosningar.

Topparnir hjá Sjálfstæðisflokknum á Skaganum eru því allir fyrrverandi annarra flokka núna. Karen fyrrverandi úr Frjálslyndum, Gísli fyrrverandi Samylkingarmaður og svo er forseti bæjarstjórnar Gunnar Sigurðsson Framsóknarmaður frá fornu fari. Þetta er orðið svolítið sögulegs eðlis í bæjarstjórninni á Skaganum.

Allt er þetta út af ágreiningi um komu flóttamanna og haft eftir Gísla að það mál hafi verið "dropinn sem fyllti mælinn". Hvort sem rétt er eftir haft eða ekki, þá er það nú svo að kornið fyllir mælinn en dropinn holar steininn. - Að gefnu tilefni er rétt að taka fram að allt þetta fólk hefur náð 23 ára aldri og "friðarspillirinn" Magnús Þór líka. Það ætti því að vera sjálfrátt gjörða sinna.

Sjálfstæðismenn með hreinan meirihluta á Akranesi

Athugasemdir

[Gísli Baldvinsson (IP-tala skráð) 14.5.2008 kl. 13:24]

Má ég bæta við að fólk þetta eru eiginlega pólitískir "flóttamenn"

[Hulda Elma Guðmundsdóttir, 14.5.2008 kl. 13:51]

Er það ekki einmitt það sem Sjálfstæðisflokkurinn er í dag, samansafn gamalla krata, allaballa og frammara og svo auðvitað leifarnar af Frjálslynda flokknum?

[Haraldur Bjarnason, 14.5.2008 kl. 14:14]

Góð ábending Gísli. Þau eru þá pólitískir "flóttamenn" í eigin sveitarfélagi, svona kannski eins og Palestínumenn eru, þótt ólíkar séu aðstæðurnar. - Hvað ætli Magnús Þór, vinur minn, segi við þessu?