Heilbrigðisráðherra kaupir sér frest

Þá er heilbrigðisráðherra og hans lið búið að kaupa sér smá frest til að undirbúa frekari herför gegn heilbrigðiskerfinu. Svo framarlega að hjúkrunarfræðingar og geislafræðingar samþykki að draga uppsagnirnar til baka. Því má hins vegar fastlega reikna með. Langlundargeð heilbrigðisstarfsmanna er ótrúlegt. 

Þetta er náttúrlega ruddaleg framkoma að draga allar ákvarðanir fram á síðustu stundu og taka ekki einu sinni raunverulega ákvörðun. Nei þetta virðist allt vera planað og stílað inn á ohf og einkavæðingu.

Landspítali frestar nýju vaktakerfi

Athugasemdir

[Lilja G. Bolladóttir, 29.4.2008 kl. 00:16]

Ég er 100% sammála þér, en þetta er alveg í takt við allt annað sem stjórnendur þessa spítala gera. Þetta er auðvitað þvílíkur dónaskapur, að halda öllu í upplausn og óvissu í allan þennan tíma, stjórnendur þess fullvissir að starfsfólkið myndi gefa eftir á lokasprettinum, en svo þegar það gerist ekki, þá má víkka tímamörkin. Náttúrulega líka fáránlegt af Önnu Stefánsdóttur, settum forstjóra (vonandi bara í mjög stuttu bili....), að segjast bara ætla að ráða erlent starfsfólk í stað næstum 100 sérhæfðra hjúkrunarfræðinga og í nánast allar stöður á röntgendeildum LSH. Heldur hún virkilega að fólk bara gangi inn af götunni, stilli sér upp á sérhæfðum deildum og nýjum vinnustað, ótalandi á okkar tungumáli og fúnkeri sem fullgildur starfsmaður? Ekki einu sinni menntaður hjúkrunarfræðingur, íslenskutalandi og jafnvel með 30 ára reynslu í starfi, myndi ganga án reynslu inn á skurðstofurnar eða stilla sér upp við öndunarvélar í svæfingum og byrja að vinna einn, tveir og þrír. En Anna, hjúkrunarfræðingur, hefur kannski hugsað sér að sjá um alla aðlögun þessa starfsfólks persónulega, því allavega var ekki byrjað að auglýsa eftir starfsfólki á röntendeildina fyrr en sl. helgi og ekki veit ég til þess að störf skurðstofu- og svæfingahjúkrunarfræðinga hafi verið auglýst.

Guðlaugur finnst mér ekki vera að standa sig sérstaklega vel sem heilbrigðisráðherra, þótt hann hafi lofað góðu í byrjun, að mínu mati. Og hann varpaði ábyrgðinni algjörlega yfir á þessa hjúkrunarfræðinga í síðustu viku, þegar hann sagðist treysta því að þetta fólk myndi ekki skilja við spítalann og stofna þannig öryggi sjúklinga í hættu. Enn og aftur ætlar heilbrigðiskerfið að stilla starfsfólki spítalans upp við vegg á þennan hátt, höfða mjög óréttmætt til samvisku þeirra og meðvirkni í garð LSH, sem nú þegar er allt of mikil.

Maður að nafni Jón Baldur Lorange, skrifaði grein í sunnudagsblað Mbl, og þar hittir hann algjörlega naglann á höfuðið, þegar hann segir orðrétt: "Það þarf að hlúa að heilbrigðisstarfsfólki en ekki hlunnfara." Þetta mættu stjórnvöld hafa í huga í yfirvofandi samningum, samningar okkar hjúkrunarfræðinga eru lausir 30. apríl og enn hefur ekki verið boðað til fundar. Þetta verður vafalaust harður slagur! 

[Hólmdís Hjartardóttir, 29.4.2008 kl. 00:39]

Tek undir með ykkur  báðum......mér skilst að a.m.k. skurðstofuhjfr. ætli að ganga út. Nokkrar hafa þegar ráðið  sig annað.