Húrra fyrir Ólafi F og Möllernum

Það er heldur betur gott mál að samgönguráðherra og borgarstjóri hafi komist að samkomulagi um að leysa þann vandræðagang sem hefur verið í flugstöðvarmálum Reykjavíkurflugvallar. Stríðsminjarnar, sem þjónað hafa flugfarþegum hingað til, eru löngu úr sér gengnar og þrengsli þar hafa meðal annars komið í veg fyrir þróun innanlandsflugs. Ný samgöngumiðstöð, sem á að vera miðstöð fyrir flug- og landsamgöngur, verður vel í sveit sett, þar sem henni er ætlaður staður vestan við Valsvöllinn á alls 7 hekturum lands. Þetta er í raun mun betri staður en núverandi flugstöð er á. Auðvitað vonast maður til að Reykjavíkurflugvöllur verði áfram innanlandsflugvöllur og kannski verða þessar breytingar til þess að hægt verður að nýta undir annað það pláss sem sparast þegar ný samgöngumiðstöð verður til. Nú er bara að láta hendur standa fram úr ermum en borgarstjóri segir undirbúning taka stuttan tíma. - Þeir eiga hrós skilið fyrir þetta Ólafur F. Magnússon  borgarstjóri og Kristján L. Möller samönguráðherra. - Möllerinn virðist vera eini ráðherrann sem eitthvað lætur að sér kveða þessa dagana. Vegabætur á Suðurlandsvegi, Vaðlaheiðargöng og nú samgöngumiðstöð í Reykjavík.  Vissulega má segja að hann dragi lappirnar í að skoða kröfur atvinnubílstjóra, sem hljóta að einhverjum hluta að koma inn á hans borð. Fjármálaráðherra ræður þó eflaust öllu í þeim efnum.

Samgöngumiðstöð hýsi alla samgöngustarfsemi

Athugasemdir

[Funi (IP-tala skráð) 31.3.2008 kl. 17:03]

Já glæsilegt að taka loksins ákvörðun um þetta svæði. Nú getur maður a.m.k. sofið vært vitandi að þarna verði flugvöllur áfram.  Ólafur er þá ekki horfinn eftir allt saman!

[Haraldur Bjarnason, 31.3.2008 kl. 17:16]

...nei greinilega glaðvakandi.

[Grétar Rögnvarsson, 31.3.2008 kl. 17:38]

Þetta er sko orðið tímabært Halli, þvílík kofaskrifli sem fólki hefur verið boðið uppá þarna.

[Haraldur Bjarnason, 31.3.2008 kl. 17:43]

Ég veit ekki hvort Reyðfirðingarnir geta notað þessa bragga á stríðsminjasafnið.

[Hulda Elma Guðmundsdóttir, 31.3.2008 kl. 18:58]

Verði þeir ekki fluttir á Árbæjarsafnið?

[Haraldur Bjarnason, 31.3.2008 kl. 19:07]

Það er líklega ekki hægt að flytja þessi kofahró eitt eða neitt. Annars er aldrei að vita hvað Reykvíkingum dettur í hug að "vernda".