Bætir kannski upp veiðileysið á sumargotssíldinni

Nú er um að gera að veiða nóg af vorgotssíldinni fyrst ekki mátti veiða sumargotssíldina sem fyllti alla innfirði Breiðafjarðar í haust og vetur. Hafró bar við sýkingu og því mætti ekki veiða. Nú ber hins vegar svo við að við Breiðafjörðinn hefur enginn orðið var við dauða síld eins og árið áður. Enn er hins vegar mikið af sprækri síld í Breiðafirði og segja kunnugir síldartorfur vera alveg inn í Kolgrafafjörð. Þá er síldarkökkur rétt utan Rifshafnar og þangað hafa strandveiðibátar verið að sækja stórþorsk steinsnar frá bryggjunni.

Allt þetta á ekki að vera til og hefur synt framhjá reiknilíkönum Hafró. Asskotans sporðurinn á þessum kvikindum er oft vísindunum til vandræða.

Síldveiðar að hefjast hjá HB Granda

"Ef þetta sé íslenska þá...."

Ánægjulegt að hrefnuveiðarnar skuli hafnar og ekki vantar eftirspurnina eftir kjötinu. Auk þess er full þörf á að veiða þessar skepnur til að halda jafnvægi í hafinu.

Hvar eða hvort sá sem skrifaði þessa frétt hefur lært íslensku er ekki gott að segja. Leitun er að setningu eins og þessari í íslensku máli: "Eftir því sem best sé vitað sé þetta fyrsta hrefna sumarsins."

Fyrsta hrefna sumarsins

Þrátt fyrir atvinnuleysið

Atvinnuleysi hefur aldrei verið meira á Íslandi en samt hjóla fleiri í vinnuna en nokkru sinni fyrr. Hver ætli þátttakan hefði orðið ef fleiri Íslendingar hefðu haft vinnu?

Aldrei fleiri hjólað í vinnuna

Jákvæð frétt

Þetta er án efa ein jákvæðasta fréttin fyrir íslenskt efnahagslíf, sem sést hefur lengi. Það að einhver skuli hafa svo mikla trú á íslensku krónunni að sá hinn sami telji svara kostnaði að falsa fimm þúsund kall er verulega athyglisvert. Myndi t.d. einhverjum detta í hug að falsa 200 danskar krónur? - Þetta er í raun stórfrétt.

Falsaður 5000 króna seðill í umferð

Svæði A og D, hvað segir það lesendum?

Standveiðarnar eru hið besta mál og gott til þess að vita hve margir eru komnir til veiða. Þær færa líf í hafnir landsins og nóg er af fiskinum enda hefur komið í ljós að flestir er fljótir að fá skammtinn sinn. Þessi frétt er hins vegar óttalega klén og aðeins sagt að mest hafi verið sótt í leyfi á svæði A og D. Ekki er ég viss um að lesendur mbl.is viti almennt hvernig svæðaskiptingin er en hún er þessi samkvæmt reglugerð um strandveiðar:

1. Eyja- og Miklaholtshreppur - Súðavíkurhreppur. Í hlut þess koma alls 1.996 tonn sem skiptast á þann veg að heimilt er að veiða allt að 499 tonn í maí, 599 tonn í júní, 599 tonn í júlí og 299 tonn í ágúst.
2. Strandabyggð - Grýtubakkahreppur. Í hlut þess koma alls 1.420 tonn sem skiptast á þann veg að heimilt er að veiða allt að 355 tonn í maí, 426 tonn í júní, 426 tonn í júlí og 213 tonn í ágúst.
3. Þingeyjarsveit - Djúpavogshreppur. Í hlut þess koma alls 1.537 tonn sem skiptast á þann veg að heimilt er að veiða allt að 384 tonn í maí, 461 tonn í júní, 461 tonn í júlí og 231 tonn í ágúst.
4. Sveitarfélagið Hornafjörður - Borgarbyggð. Í hlut þess koma alls 1.047 tonn sem skiptast á þann veg að heimilt er að veiða allt að 419 tonn í maí, 366 tonn í júní, 157 tonn í júlí og 105 tonn í ágúst.

"Fréttin" á mbl.is er kópíeruð beint af vef Fiskistofu án nokkurra skýringa en eflaust vita flestir lesendur þess vefjar hvar svæði A og D eru. Meira að segja er hún kópíeurð með þeim villum sem þar eru eins og þessari: "Á þessari fyrstu viku héldu 321 bátur til veiða..." - Auðvitað átti þarna að standa "Í þessari fyrstu viku hélt 321 bátur til veiða."

Svona gerist þegar blaðamenn vinna ekki vinnuna sína og kópíera texta annarra. Enginn fjölmiðill, sem ætlar að vera vandur að virðingu sinni gerir þannig hluti.

407 komnir með leyfi til strandveiða

Er það gagnkvæmt?

Ef það er rétt sem þessi breski hvítflibbaglæpalögmaður heldur fram að ekki sé hægt að handtaka grunaðan íslenskan bankaræningja í Bretlandi þá hlýtur slíkt að vera gagnkvæmt milli þjóðanna. Ísland hlýtur því að geta verið skálkaskjól fyrir grunaða breska glæpamenn, sem reikna má með að komi hingað í framhaldinu, hvort sem þjóðin vill það eða ekki. - Ljótt er, ef satt er......og aumingja Siggi hann þorir ekki heim.

Sigurður ræður breskan lögmann

Eignir eða þýfi?

Nú hriktir án efa í IKEA innréttingunum á Manhattan. Í fréttinni er talað um eignir. Það hlýtur að orka tvímælis núna þegar búið er að upplýsa um allt sukkið og undanskotin frá bönkunum í eigin þágu. Það er spurning hvenær rétti tímapunkturinn er að tala um þýfi en eflaust má færa jafn sterk rök fyrir því og að kalla þetta eignir.

Guardian: Búið að birta stefnuna

Þessi "virtu" endurskoðunarfyrirtæki

Athyglin í öllu þessa bankasukki hefur verið á opinberu eftirliti auk útrásarskúrkanna sjálfra. Nú ber nýtt við því eitt af endurskoðunarfyrirtækjunum með útlendu nöfnunum, sem hafa verið áberandi hér á landi, er nú sakað um svik eins og kemur fram í fréttinni:

PricewaterhouseCoopers tók þátt í svikum

Glitnir höfðar jafnframt mál gegn PricewaterhouseCoopers, fyrrum endurskoðendum bankans, fyrir að greiða fyrir og taka þátt í að dylja þau sviksamlegu viðskipti sem Jón Ásgeir og félagar komu í kring og sem að endingu leiddu til falls bankans í október 2008.

Hvernig átti opinbera eftirlitið að geta sinnt störfum sínum, ef það reynist rétt sem þarna stendur, að þessi "virtu" eftirlitsfyrirtæki hafi verið handbendi fjárglæpamannanna?

Óska kyrrsetningar eigna

Eyjafjallajökull slappur miðað við bankaræningjana

Þetta eru ekki háar tölur miðað við það sem við höfum verið að heyra í fréttum um þjófnað úr bankakerfinu. Eyjafjallajökull er ekki hálfdrættingur á við bankaræningjanna hvað skaðsemi varðar.

400-600 milljóna tjón vegna gossins

Eyða þarf þessari óvissu

Það væri nú eftir öðru að eitthvert kerfisfrumvarp verði til þess að fjöldi fólks verði án atvinnu í sumar ef hvalveiðar verða ekki eins og til hefur staðið. Á síðustu hvalvertíð störfuðu um 50 manns á Akranesi á vöktum í þrjá mánuði við vinnslu hvalkjötsins, annar eins fjöldi vann í hvalstöðinni í Hvalfirði og tveir hvalbátar voru gerðir út með um 30 manna áhöfn. Fyrir utan þetta hafði fjöldi iðnaðarmanna og annarra vinnu af veiðum og vinnslu.

Búið er að gefa út að leyft verði að veiða jafn marga hvali nú og í fyrra. Ríkisstjórnin þarf því að taka af skarið nú og eyða allri óvissu. Ríkisstjórn sem hefur áhyggjur af atvinnuleysi og er að gera ráðstafanir vegna þess getur ekki látið slík atvinnutækifæri og háar tekjur framhjá sér fara.

Lagafrumvarp setur veiðarnar í uppnám