Gleðilega þjóðhátíð

Gleðilega þjóðhátíð gott fólk. - Hér á Akranesi byrjaði fólk þjóðhátíðardaginn á safnasvæðinu að Görðum í besta veðri, sól og blíðu. Strax kl 10 var fólk farið að streyma þangað, kaffi og meðlæti í boði auk þess sem krakkarnir fengu andlitsskreytingu í fánalitunum og hestamenn teymdu gæfa klára undir þeim.

Síðan halda herlegheitin áfram á Akratorgi í dag, torginu sem í fyrstu var kallað Skuldartorg. Ekki vegna áhvílandi skulda heldur vegna þess að þarna stóð í eina tíð húsið Skuld. En ég tók nokkrar myndir upp í Görðum í morgun og læt sýnishorn fylgja hér með. Bæti svo fleiri myndum inn síðar í dag.

    

1. Sæljónið hans Magga í Efstabæ (romm) í forgrunni, sér í Sandahúsið gamla, Sýrupart og minningarturninn í kirkjugarðinum (það er verið að laga fleiri turna en hjá séra Hallgrími á Skólavörðuholti)

2. Hestamenn voru mættir með gæðinga sína og teymdu undir krökkunum.

3. Þær tóku sig vel út í góða veðrinu þessar prúðbúnu konur.

4. Það krefst fullrar einbeitingar að taka við íslenska fánanum á kinnina.

5. Glæsilegar eru þær þarna uppáklæddar, systurnar Sigurbjörnsdætur.

Hátíðarhöldin á Akratorgi hófust kl. 14. Gísli S. Einarsson bæjarstjóri og Herdís Þórðardóttir alþingismaður fluttu stuttar ræður en ávarp fjallkonunnar var að þessu sinni flutt af Þórgunni Stefánsdóttur. Síðan var haldið í skrúðgöngu að Akraneshöllinni á Jaðarsbökkum, þar sem sérstök hátíðardagskrá fer fram. - Hér eru nokkrar myndir til viðbótar.

    

    

1. Þórgunnur Stefánsdóttir flytur ávarp fjallkonur

2. Fánahylling skáta á Akratorgi

3. Kórsöngur á torginu

4. Skagamenn fylgjast með ávörpum á Akratorgi

5. Skrúðgangan leggur af stað frá Akratorgi. Skátar í fararbroddi.

6. Lúðrasveitir eru ómissandi í skrúðgöngum og trommarar þeirra enn mikilvægari til að slá taktinn.

7. Þessar huldu andlitið með íslenska fánanum.

8. Jói Kalli og Fedda létu sig ekki vanta.

9. Aðaltöffarinn í skrúðgöngunni; Þórhallur Ásmundsson, blaðamaður á Skessuhorni.

10. Skrúðgangan komin á Garðabrautina á leið sinni upp á íþróttasvæðið á Jaðarsbökkum.

Athugasemdir

[Sigrún Jónsdóttir, 17.6.2008 kl. 12:27]

Gleðilega þjóðhátíð Skagamenn.

Takk fyrir myndirnar Haraldur, ég hlakka til að sjá fleiri.

[Guðríður Hrefna Haraldsdóttir, 17.6.2008 kl. 19:26]

Frábærar myndir! Ég sá skrúðgönguna í gegnum vefmyndavél sjúkrahússins ... heheheh og síðan út um gluggann þegar hún var komin á Garðabrautina.

[Haraldur Bjarnason, 17.6.2008 kl. 19:31]

...skammastu þín Gurrí að druslast ekki út úr húsi

[Eyrún og Marinó Bjarni (IP-tala skráð) 17.6.2008 kl. 20:17]

Gleðilega þjóðhátíð pabbi og afi...

 Við fórum nú ekki í skrúðgöngu en röltum þess í stað um miðbæinn, það var frekar kalt og Nóinn þreyttur svo við stöldruðum stutt við

Leitt hvernig fór með vin okkar hér í næstu sveit, sjálfan ísbjörninn. Nú er bara spurning hvar húnninn hennar er staddur? ...hmmm og ég á leið í óvissuferð í Skagafjörðinn á fimmtudaginn, vonandi ekki hættuför. 

[Helga Guðrún Eiríksdóttir, 17.6.2008 kl. 21:02]

Rosa flottar myndir.. og óvissuferð í Skagafjörðinn.. hehe spennandi á mínum heimaslóðum!

[Haraldur Bjarnason, 18.6.2008 kl. 00:26]

Takk fyrir öll sömul. Eyrún Huld þið verðið að hafa klára skyttu í óvissuferðina. Ég hef grun um að margir menntaskólakennarar þyki girnilegir á ísbjarnamatseðil!!!!- svo segir einhver draumspakur að sá þriðji eigi eftir að koma á land þarna. Annars er ótrúlegt að þessi gamla birna hafi verið með einhverja húna með sér......kannksi er þessi sem skotinn var um daginn afkomandi hennar, hver veit....bið að heilsa norður úr blíðunni á Skaganum.

[Einar Vignir Einarsson, 18.6.2008 kl. 00:30]

Halli ertu komin á Skagan aftur???

[Haraldur Bjarnason, 18.6.2008 kl. 07:33]

Já verð þar í sumar Nenni. Er í afleysingum sem blaðamaður á Skessuhorn og líkar bara helvíti vel.