Var þörf fyrir þyrlu líka?

Það er greinilegt að strákræfillinn sem í örvinglan sinni labbaði inn í banka í Hafnarfirði með búrhnífa í hendi er talinn mjög hættulegur glæpamaður. Eðlilegt er að leit sé gerð að honum og reynt að ná honum sem fyrst en viðbúnaðurinn er mikill. - Var svo brýnt að ná honum að þyrlu þyrfti til þess að leita? - Maður veltir þessu fyrir sér í ljósi þess að jafnan er nauðsyn útkalla metin gaumgæfilega áður en þyrla er send af stað vegna mikils kostnaðar. Dæmi eru um slíkt þegar sjómaður slasaðist út af Austfjörðum ekki alls fyrir löngu og sagt var frá í fréttum. - Hver borgar svo kostnaðinn við þyrluna þegar þetta er ekki björgunaraðgerð heldur lögregluaðgerð. Er það bankinn eða færist þetta á reikning lögreglu eða Landhelgisgæslunnar? 

Þessi strákur á greinilega bágt og þarf á hjálp að halda. Svona lagað gera ekki ungir menn nema þeir séu í verulega slæmum málum. Ekki virðist hann hafa haft mikið upp úr krafsinu eftir því sem bankamenn segja.

Ræninginn ófundinn

Athugasemdir

[Gústaf M. (IP-tala skráð) 7.5.2008 kl. 20:05]

Ég er nú nokkuð viss um að þyrluflugmennirnir hafi bara verið í sínu reglulega æfingaflugi þegar þeir buðu fram aðstoð sína.  Annars er það alltaf þú sem borgar fyrir þetta :-)

[Haraldur Bjarnason, 7.5.2008 kl. 20:14]

Jú það er rétt, sama hvaða sjóður það er þá er þetta alltaf skattgreiðenda að lokum. Eflaust hafa þeir fengið einhverja æfingu út úr þessu en útkall var það samt. Aðeins spurning um áherslur, sem ég var að velta fyrir mér. - Læðist að mér að ekki þurfi svona mikinn viðbúnað út af þessu strákgreyi.

[Víðir Benediktsson, 7.5.2008 kl. 20:14]

Af hverju voru frönsku orrustuþoturnar ekki sendar á peyjann. Þetta var akkúrat verkefni fyrir þær enda vopnaðar flugskeytum og miðunarbúnaði. Svo hefði vinnuskólinn í Hafnarfirði tínt gaurinn upp í sumar.

[Haraldur Bjarnason, 7.5.2008 kl. 20:15]

Ætli hann hafi ekki verið fyrir utan "loftrýmið"

[Lilja G. Bolladóttir, 7.5.2008 kl. 20:31]

Ekki virðist hann þó hafa hulið sig vel, líður örugglega ekki á löngu þar til einhver ber kennsl á hann. Og lætur þá Landhelgisgæsluna vita, svo þeir geti sótt greyið.

[Haraldur Bjarnason, 7.5.2008 kl. 20:37]

Já ég held nú að strákgreyið skili sér fljótt. Hef á tilfinningunni að eitthvað annað en glæpahneigð hafi ráðið ferðinni.

[Guðrún Þóra Hjaltadóttir, 7.5.2008 kl. 22:11]

Það hefur trúlega verið mikil þörf fyrir einhver "efni" sem fékk hann til að framkvæma þennan verknað.

Mér finnst líka önnur hlið á þessu það er að þegar það fréttist að allt fer í gang verður það vonandi víti til varnaðar fyrir aðra.

[Haraldur Bjarnason, 7.5.2008 kl. 23:34]

Ef það er rétt sem þú ályktar Guðrún Þóra að einhver efni hafi fengið drenginn í þetta þá er ég hræddur um að miklar lögregluaðgerðir dugi ekki til að vera víti til varnaðar. Fíknin er sterkari en hræðsla við slíkt.

[Benedikt V. Warén, 8.5.2008 kl. 00:39]

Maður veltir því oft fyrir sér, hvor er verri.  Sá sem stendur fyrir framan borðið með hótun og hylur andlit sitt og fær nokkra þúsundkalla, eða stjórnandinn sem fer út með tugi milljóna í starfslokasamning. 

[Haraldur Bjarnason, 8.5.2008 kl. 08:18]

Satt að segja held ég að þeim fyrrnefnda sé hægt að bjarga en hinum síðarnefnda er alls ekki við bjargandi, Pelli. Hann lifir í þeirri trú að þetta sé eðlilegt og samfélagið tekur þátt í því.