Enn og aftur finnast týndir fiskar

Þá eru þeir farnir að veiða loðnu á Breiðafirði, greinilegt að einhver ganga hefur komið vestan að, eins og stundum gerist. Enn og einu sinni hefur hún synt framhjá Hafró og setur þá líklega strik í reikninginn. Óvíst er samt hvort það strik veldur nokkrum usla í reikningshaldi Hafró, þar á bæ kunna menn eflaust einhverjar skýringar á þessu, þó ekki væri nema með þögninni.  Litlar líkur verður þó að telja á auknum loðnukvóta, nema þeim mun meira komi í ljós fyrir vestan. Loðnuveiðistoppið, sem sett var á um tíma, hafði alvarlegar afleiðingar fyrir loðnuvinnslu landsmanna og ekki væri amalegt fyrir þjóðarbúið að hafa þá milljarða, sem fóru forgörðum vegna þess, núna þegar allt er í kalda koli í efnahagsmálum en gott verð og mikil eftirspurn eftir loðnuafurðum. Lærdómurinn sem draga má af misvísandi upplýsingum vísindamanna um loðnustofninn og ekki síður þorskstofninn ættu að sýna okkur að aðferðir vísindamanna og viðvera þeirra við rannsóknir þurfa mikillar skoðunar við. Loðnan og þorskurinn hafa týnst við Ísland og kanadískir vísindamenn týndu hvorki meira né minna en 40 þúsundum hvölum. Miðað við það er ekki að undra að þeir íslensku týni þessum loðnukvikindum, þau eru heldur smærri en Grænlandssléttbakur.

Loðna veiddist á Breiðafirði

Athugasemdir

[Hafsteinn Viðar Ásgeirsson, 18.3.2008 kl. 08:20]

He,he, já mun smærri en Grænlandssléttbakur. Ég er nú reyndar á því að það hafi orðið að stöðva loðnu veiðarnar á dögunum, fyrst það er á annað borð verið að hlusta á Hafró. Held raunar að það hefði átt að gera eins og Norðmenn og banna loðnuveiðarnar í einhver ár, það gæti orðið fróðleg útkoma úr því.

Nú held ég hinsvegar að ráðherrann ætti að taka sig saman í andlitinu og auka veiðiheimildir í þorski, svona áður en að hann fer að ganga á land við Skúlagötuna. En það er kannski það sem þarf?

[Haraldur Bjarnason, 18.3.2008 kl. 08:35]

Já Hafsteinn, stórþorskurinn nálgast Skúlagötuna. Verst að hún er nú svo langt frá sjó eftir að þeir fylltu upp og Kolbeinshausinn hvarf og Sæbrautin varð til. Annars hefur það nú verið reynt hér að banna loðnuveiðar, var það ekki 1987, eða 1988? sem veiðar voru bannaðar í eitt ár. Stóra málið er að aðferðir vísindamanna virðast ekki ganga upp. Þeir einfaldlega hafa ekki hugmynd um stærð einstakra stofna, skiptir þá engu hvort það er loðna eða þorskur, jafnvel hvalur eins og kemur í ljós hjá Kanadamönnum.

[Hafsteinn Viðar Ásgeirsson, 18.3.2008 kl. 11:59]

Nei það er dagljóst og búið að vera mjög lengi, þeir vita raunverulega ekkert þeir geta bara giskað eins og aðrir og giska oftast vitlaust. Varðandi loðnuna, þá hef ég alltaf haldið að sumarveiðarnar hafi verið skaðræði, það er sök sér að taka eitthvað til manneldisvinnslu þegar hún gengur til hrygningar og við getum metið hversu mikið er að skila sér. Þetta virðast Norar hafa ákveðið að veðja á og þeir leyfðu ekki veiðar núna þó stofninn teldist (samkvæmt ágiskunum) vera 470 þúsund tonn. Árangurinn hefur ekki látið á sér standa í Barentshafinu. 

Það er óhemja af stórum þorski á ferðinni núna sem enginn getur snert vegna kvótaleysis. Hafi einhverntímann verið ástæða til að endurskoða eitthvað, þá er það núna.