Toppadýrkun Reykvíkinga

Kannski eru útvarps- og sjónvarpsauglýsingar Sjálfstæðisflokksins að bera árangur? Í þeim er athyglisvert að Hanna Birna minnist ekki einu orði á að hún sé fulltrúi Sjálfstæðisflokksins og hún nefnir flokkinn aldrei á nafn. Hún segir aðeins "Við í borginni." Með þessu hefur henni kannski tekist að fela það hvað hún stendur fyrir og í raun afneitað flokknum, sem er skiljanlegt í ljósi "afreka" þessa flokks við hrunið.

Annars er það athyglisvert að alla tíð hafa sveitarstjórnarkosningar í Reykjavíkurhreppi snúist um hver eigi að bera kórónuna á toppnum. Þar hefur einhverskonar kónga- eða leiðtogadýrkun verið ráðandi og málefni hafa litlu skipt. Þegar Sjálfstæðisflokkurinn dubbaði svo Ólaf F. Magnússon upp í forystusætið til þess eins að ná völdum voru það hins vegar ekki kjósendur sem völdu sér kónginn heldur flokkurinn og sem fyrr skiptu málefnin þá engu.

Flestir vilja Hönnu Birnu

Athugasemdir

[Haukur Gunnarsson, 27.5.2010 kl. 10:11]

Vonum að við fáum ekki þann topplausa Dag sem borgarstjóra

[Haraldur Bjarnason, 27.5.2010 kl. 11:50]

Haukur. Borgarstjóri er í raun framkvæmdastjóri og þarf því fyrst og fremst að hafa þekkingu og hæfileika í það starf. Toppur eð toppleysi skiptir þar engu máli. Annars er mér nokk sama hver er framkvæmdastjóri Reykjavíkurhrepps enda hef ég aldrei haft þar kosningarétt.

[Hulda Elma Guðmundsdóttir, 27.5.2010 kl. 13:09]

Þú ert alltaf jafn góður Halli. Ég held að Hanna Birna hafi tapað mörgum atkvæðum í gærkveldi þegar sjónvarpsáhorfendur urðu varir við fýlusvipinn sem kom á hana þegar henni var mótmælt.

[Haraldur Bjarnason, 28.5.2010 kl. 07:59]

Í dag er heilsíðuauglýsing frá henni í Fréttablaðinu og hvergi minnst á Sjálfstæðisflokkinn, aðeins x-d merki í horninu. Það er þetta sem er að takast hjá henni. Hún telur fólki trú um að x-d standi bara fyrir hana sjálfa en ekki Sjálfstæðisflokkinn því þá myndi merki flokksins með ránfuglinum líka vera í auglýsingunni.