Á leið á Skagann

Jæja þá er komið að því að hugsa sér til hreyfings. Dagurinn fer að mestu í að undirbúa flutning til Akraness þar sem ég ætla að mestu leyti að vera í sumar við afleysingar hjá héraðsfréttablaðinu Skessuhorni . Það gekk erfiðlega að finna húsnæði, þótt ekki væru kröfurnar stórar, en leigumarkaður virðist vera umsetinn á Akranesi. En búið að leysa málið.

Þetta árið hef ég verið við störf á Akureyri, aðallega prófarkalestur en einnig blaðamennsku og skyld störf. Nú tekur fréttamennskan við á ný en síðustu 30 árin hefur hún nær eingöngu verið mitt hlutskipti með smá hliðarsporum þó. Það verður spennandi að takast á við verkefnin hjá Skessuhorni, sem þjónar Vesturlandi öllu. Ekki ósvipað og er með Ríkisútvarpið á Austurlandi sem er með allt gamla Austurlandskjördæmið undir, en þar var ég í 18 ár og áður hjá héraðsfréttablaðinu Austurlandi, sem hafði sama hlutverk.

Vona að ég eigi skemmtilegt "comeback" á Skagann. Ég flutti þaðan árið 1986 eftir að hafa stýrt Bæjarblaðinu í 8 ár í samvinnu við góða menn.

Athugasemdir

[Sigrún Jónsdóttir, 6.6.2008 kl. 09:52]

Eigðu gott sumar á Skaganum Haraldur

[Haraldur Bjarnason, 6.6.2008 kl. 09:56]

Takk fyrir það. Ég fékk meira að segja húsnæði innarlega á Vesturgötunni. Þannig að nær kemst ég ekki æskuslóðunum.

[Sigrún Jónsdóttir, 6.6.2008 kl. 10:13]

Hún hefur svo sannarlega aðdráttarafl Vesturgatan, fyrir þá sem hafa alist þar upp.  Eldri sonur minn vildi flytja þangað aftur fyrir u.þ.b. ári síðan og skoðaði bara hús við Vesturgötuna, en hætti við flutninga þar sem kærastan vildi ekki fylgja með

[Jóhann Elíasson, 6.6.2008 kl. 10:43]

Gaman að vita, Haraldur og gangi þér sem allra best.  Þú hefur sko heldur betur átt stórmerkilegan feril og alltaf fannst mér eins og gamall og góður "heimilisvinur" væri í útvarpinu, þegar ég hlustaði á "Auðlindina" hér í den.  Ég á nokkuð mara ættingja á Skaganum og meira að segja er fólk á Vesturgötunni.  Enn og aftur óska ég þér gæfu og bjartrar framtíðar.

[Haraldur Bjarnason, 6.6.2008 kl. 21:50]

Já þakka þér fyrir Jóhann. Þetta sem þú segi rum Auðlindina hef ég heyrt frá mjög mörgum á þessum rúmu tveimur árum síðan hún var lögð af. Þessi þáttur hafði mikla hlustun en ekki að sama skapi skilning þeirra sem ákváðu að leggja hana niður. - Nú er ég mættur á Skagann.- Kom um kl. 21 og er að koma mér fyrir.

[Hulda Elma Guðmundsdóttir, 7.6.2008 kl. 10:16]

Þetta er það sem þú kannt öðrum betur. Gangi þér vel á Skessuhorninu vonandi get ég fylgst með því á netinu. Kveðjur bestar Elma