Skripaleikur hrunflokkaspjátrunga

Þetta er ljóti skrípaleikurinn sem þeir stunda á þinginu þessir spjátrungar frá hrunflokkunum. Langar ræður um nánast ekki neitt eru til þess eins fallnar að tefja þingstörf og koma í veg fyrir umfjöllun sem máli skiptir fyrir þjóðina.

Þetta tekur við hjá þeim núna eftir að vera búnir að spyrja forsætisráðherra sömu spurninganna trekk í trekk til þess eins að fá sömu svörin. Þetta lið er til skammar og því fyrr, sem hægt verður að slíta þingi og koma þessu liði heim, því betra.

Málþóf á Alþingi

Enn árið 2007 í bönkunum

Það er alveg ljóst að í bönkum landsins er enn árið 2007. Þar hafa stjórnendur ekkert lært og ætla sér ekkert að læra af reynslunni. Enn eru menn að maka krókinn á kostnað almennings. Þetta dæmi um ríkisbankann Landsbankann sýnir siðleysið glöggt. Stjórnendur leita allra leiða til að fá sem mest í eigin vasa.

Lúta ekki lögum um laun

Senditíkur Davíðs halda áfram

Senditíkur Davíðs á Alþingi eru nú á fullri ferð við að dreifa athyglinni frá óþægilegri umræðu um ofurstyrki þingmanna Sjálfstæðisflokksins frá útrásargenginu. Þeir hafa komið látlaust með sömu spurningarnar til þess eins að fá sömu svörin. Nú draga þessar senditíkur enn og aftur trúverðugleika forsætisráðherra í efa. Þeir minnast ekkert á Davíð Oddsson fyrrverandi Seðlabankastjóra og hvernig hann sem forsætisráðherra úthlutaði sér seðlabankastjórastöðunni og ákvarðaði launin sjálfur.

Allar þessar sjónhverfingar þeirra eru til að fela sannleikann á bak við sukk íhaldsins og tefja framgang mála á Alþingi. Davíð og Mogginn birta svo leiðara og fréttir af öllu þessu rugli og aðrir fjölmiðlar hlaupa líka til eins og um blákaldar staðreyndir sé að ræða.

Spyr um sannleiksskyldu ráðherra

Auka þorskveiðina umtalsvert

Næsta skref Jóns ætti að vera að auka þorskveiðiheimilir í að minnsta kosti 200 þúsund tonn og útdeilda viðbótinni í takt við það sem hann gerði með viðbót við skötuselskvóta. Þannig getur hann tekið fyrsta skrefið og þarf því ekki að bíða eftir að aðrir reyni að þurrka tár grátkórs kvótaeigendafélagsins.

Fyrst Hafró telur möguleika á einhverri aukningu þorskveiða er ljóst að umtalsvert má auka við þær.

Ekki lengur eftir neinu að bíða

Sólríkur þokuslæðingur og kuldi

Hann var nú ekki sólríkari sjómannadagurinn á Akureyri en það að þoka var fram eftir degi og skítakuldi.

Annars er jákvæðni góð og þessi frétt er svo sannarlega dæmi um hvernig hægt er að gera gott úr hlutunum.

Sólríkur sjómannadagur á Akureyri

Amböguflaumur í frétt um ánægjulegan atburð

Þær eru ótrúlega margar ambögurnar sem þeim, er þessa frétt ritar, tekst að koma fyrir þegar sagt er frá annars ánægjulegum tíðindum fyrir Norðfirðinga.
Hvernig getur skip bæst í bæjarflotann í kringum sjómannadag? Það kom til heimahafnar daginn fyrir sjómannadag en lagðist ekki að heimabryggju. Neskaupstaður skrifast ekki Neskaupsstaður og sagt er í Neskaupstað en ekki á Neskaupstað. Hverjir eru svo þessir himnaguðir sem sagt er frá í fleirtölu?
Lágmarks þekkingar og íslenskukunnáttu þarf að krefjast af þeim sem skrifa fréttir.

Vel tekið á móti Beiti

Til hamingju Norðfirðingar

Norðfirðingar haf nú fengið nýjan glæsilegan Beiti og full ástæða til að óska áhöfn, útgerð og Norðfirðingum öllum til hamingju með skipið. Vel er við hæfi að taka á móti skipinu um sjómannadagshelgi enda hafa Norðfirðingar öðrum fremur haldið sjómannadaginn í heiðri og gera enn.

Nýr Beitir til hafnar í dag

Löngu tímabært

Auðvitað á að hefja strandflutninga aftur og með svona 4-5 lykilhöfnum. Síðan er hægt að hafa landfutninga út frá þeim. Það er löngu tímabært að taka upp strandflutninga aftur. Allar þjóðir sem eiga land að sjó eru með strandflutninga og það ekki bara á vörum heldur jarðvegs- og efnisflutninga líka. Með þessu er hægt að létta stórlega álagi af lítilfjörlegum þjóðvegum fyrir utan alla hættuna sem umferð stórra bíla skapar á mjóu vegunum hér. Miklu mjórri og vanþróaðri vegum en í nágrannaríkjum, sem þó hafa sína strandflutninga.

Ég skil ekki alveg það sem kemur fram í þessari frétt að heimahöfn strandflutninga eigi að vera á Akureyri einfaldlega vegna þess að hún þarf að vera þar sem millilandaskipin leggja að sem er á höfuðborgarsvæðinu. Grundartangi gæti líka þjónað þessi vel enda er þar flutningahöfn framtíðarinnar. Góð höfn og nóg pláss í landi sem engin byggð þrengir að.

Jafnvel þo ríkið þurfi að taka einhvern þátt í sjóflutningunum þá koma þeir til með að spara mun meira þegar horft er á hlutina í samhengi.

Strandsiglingar álitlegar

Þessu mátti búast við

Þessi 10 þúsund tonn sem bætt er við þorkskvótann eru auðvitað smáræði og búast mátti við að LÍÚ myndi gráta sáran eftir þessa úthlutun. Friðrik segir þau hverfa að mestu í strandveiðina en þau hverfa ekki þótt þau fari þangað. Þessi fiskur kemur að landi og ríkið fær leigutekjurnar en ekki einhverjir "kvótaeigendur".

Það virðist ekkert hrófla við Hafró í geymslustefnu þeirra. Hún hefur ekki virkað í þá áratugi sem henni hefur verið haldið til streitu. Eftir þessa niðurstöðu er sjálfsagt að hreinsa til hjá Hafró og hlusta á rök þeirra sem sýnt hafa fram á ruglið í stefnu Hafró.

Strandveiðarnar éta aukinn þorskkvóta

Þorskurinn farinn að synda inn í reiknilíkönin

Hvað er að gerast hjá Hafró? Er þorskstofninn virkilega orðinn svo stór að hann er farinn að synda inn í reiknilíkön Hafró líka? Þá er nú verulega mikið af þorski í sjónum og jafnvel meira en allir, nema Hafró, hafa séð undanfarin ár.

Annars eru þessi ummæli forstjóra Hafró örugglega ummæli aldarinnar: „Styrking hrygningarstofns þorsks er skólabókardæmi um hvernig aðgerð í fiskveiðistjórnun getur skilað árangri," sagði Jóhannn Sigurjónsson, forstjóri Hafrannsóknarstofnunar í dag. - Skólabókardæmið er þá að ganga upp eftir ríflega 30 ár og ómældan kostnað fyrir þjóðina í töpuðum tekjum af sjávarútvegi.

Þorskstofninn stækkar